Arno Steffen „op kölsch“Wenn Nazis kölsche Songs spielen, „mösse mir uns wehre“
„Ich dachte, ich höre nicht richtig“, erinnert sich Arno Steffen an die Rechten-Demo bei der Kölsche Lieder gesungen wurden.
Copyright: Matthias Heinekamp
Köln – Eijentlich fing dä Daach janz normal an. De Sun dät schinge, und de Vüjjelcher däte a Leedche singe. Jenoch ze Esse un ze Drinke em Köhlschrank, usjeschlofe un jot jelaunt – bes dat Telefon jingk: Ene Fründ reef an un verzällte, dat do jrad en Saach passeet, die ich nit jläuve künnt, wenn ich se nit met eijene Aure söch un met eijene Uhre hüre dät.
Om Domvürplatz, jäjenövver vum Haupbahnhof dät sich jrad ene Haufe Lück versammele, met Lautsprechere, ner klein Bühn, met Transparente und räächte Sprechchör. Un donoh woote kölsche Leeder jespillt. Wat ich dann dozu sare dät un op ich dovun wöss?
Domet sich de Streithähn nit an de Wäsch jonn
Wörterbuch
Vüjjelcher – Vögelchen jläuve – glauben lieje – liegen woote – wurden Hetzjaachte – Hetzjagden Momang – Moment decke Pitter – die große Petersglocke im Dom kräten – bekamen, kriegten ovends – abends iwich – ewig Loht – Lasst Rauh – Ruhe
Do kunnt ich nit mieh doheim lieje blieve un ben tireck op dä Bahnhofsvürplatz, wo sich zwei Lager jebeldet hatte. Dat eine bestund us schwatz jekleidete, junge Minsche met Transparente, op denne stund „Et jit kei Räch op Nazipropaganda!“ un „Köln gegen Rechts“.
Dozwesche wor en kleine Jass, die vun dr Polizei em Kampfanzog freijehalde woot, domet sich de Streithähn nit an de Wäsch jonn kunnte.
Op dä andere Sick wore, als normale Bürjer verkleidet, jrimmige, schläch tätowierte „Begleitschützer“. Ich meine, ich hätt dä ein oder andre schon ens jesinn op su ener „Hooligans jäjen Salafisten“-Demo. Se wollte an de Ausschreitunge en Chemnitz un de Übergriffe en dr Sylvesternaach in Kölle erinnere, ävver de rächte Hetzjaachte op Minsche in Chemniz hatten se verjesse. Zweschedurch hatten se och noch ene Jassredner us Dresden, der pegidanah övver dä Unterjang vun däm Abendland am referiere wor.
E Stöck „kölsch Ovendland“ es en däm Momang ungerjejange
Zur Person
Arno Steffen ist erfolgreicher Musiker, Komponist und Musikproduzent. Er war Mitglied der Zeltinger Band, von Triumvirat und L.S.E. und schrieb zahlreiche Filmmusiken u.a. für den Tatort. Er ist einer von sieben Autoren, die wöchentlich im „Kölner Stadt-Anzeiger“ schreiben. (fra)
E Stöck „kölsch Ovendland“ es en däm Momang wirklich ungerjejange. Nit dat die Altbier ussjeschängk han, ävver et wor schon en groteske Situation, wie de ärme Touriste met ihre Samsonite Rollköfferche verschreck durch de freijesperrte Hassjass Richtung Haupenjang jewandert sin un die Welt nit mieh verstundte. Un als dozo dann e Leed wie „ Drink doch eine met“ oder „Echte Fründe ston zesamme“ en voller „Decke Pitter Lautstärk“ ze hüre wor, kräten se doch Realitätszweifel – dat wore doch de Leeder die se ovends noch beim „Früh“ jeliert hatte?! Mir wot et tatsächlich schläch un en deefe Wot kom en mer huh. Öm sich domet bei de Minsche anzebiedere, de brunge Jesinnung hinger dä Kölsche Leeder ze versteche, vür dä janze Welt su e Beld vun Kölle affzojevve? Dojäje mösse mir Kölsche uns wehre...
Das könnte Sie auch interessieren:
Mir Musiker vun Arsch Huh han dat jemat und dat Leed „ Su läuf dat he“ opjenumme (hier lesen Sie mehr). „Ihr künnt uns nit täusche, et es die iwich ahle Seuche“, singe mer do. „Loht uns Leeder en Rauh!“ Un mer hoffe, alle Kölsche singe zosamme un jot jelaunt met.