Michael Hehn op kölschDer Nubbel schreibt an seine Jecke
„Nubbel“ Michael Hehn
Copyright: Decker
Köln – Ming leev Fastelovendsjecke, leev Kölsche, öm et tireck vürav zo sage: Dis Session kunnt ich nix doför, ävver och janix! E dreckelig klein Fresen, wat uns he nit nor dä Fastelovend kapott jemaht hät, fällt nit en minge Zoständigkeitsbereich.
Wann die Lück met Trone en de Auge am Rusemondag em homeoffice setze müsse statt am Zogweg en Kamelle zo erstecke. Wann dä FC em leere statt em volle Stadion verleert (ovschüns mer dis Saison fruh sin kann, dat sich dä Driss keiner anzoloore bruch). Wann mer am Engk vum Mond noch dä Büggel voll han, weil mer die Nüsele en keiner Weetschaff uno p keiner Setzung vertrööte kunnte.
All dat ben ich nit schold!
Wann einem an Wieverfastelovend en Kölle op eimol jewahr weed, wie sich Karneval en Düsseldorf jedes Johr anföhlt. Wann uns Pänz em Distanzliehre immer mih Distanz zom Liehre opbaue. Wann mer dis Johr keine Plack an der Schnüss hät för luuter Bützerei.
All dat ben ich nit schold! Un all dat, wat dä Fastelovend usmäht, kunnte un durfte mer nit: Jemeinsam bütze, danze, Musik maache, schunkele, singe, fiere, süffele un müffele.
Das könnte Sie auch interessieren:
Eine Truus, dä mer en der schwere Zick hatte wor janz jewess uns Dreijesteen, dat sich met vill Hätz doför enjesatz hatt, dä Fastelovend zo dä Lück zo bränge, för die Drei stell ich en Kääz em Souterräng op, dat se nääks Johr richtig fiere künne.
Un esu wie et Trifolium künnt Ehr all Üch immer op mich verloße: Ich ben immer an Ührer Sick, ich ben Ühre Erlüser un Trüüster, wann immer Ehr, ming kölsche Föttchesföhler, Kläävbotze, Schruppsüffer un Mömmesfresser ens widder Dress jemaht hatt. Dann Ühr Sünde un Biestereie kummen jo quasi wie vun allein (ich kennen Üch jo ald zick 2000 Johr) un ich halden drop jähn am Äschermeddwoch för Üch ming Fott en et Füür un nemmen Üch de Bicht av (selvs däm Woelki, och wann dat jet länger doort), weil Ehr Kölsche mer ärch am Hätze litt.
Sterben vor lauter Langeweile
Ävver doför muss dä Fasteleer endlich widder müjjelich sin, ehtz dann hät och ming Levve widder ene Senn, söns stirven ich jo vür luuter Langwiel.
Wat es dann ene Nubbel ohne Job? Dat es jo wie Altbier met Jeschmack. Dat jitt et nit! Dat es nit vürjesinn! Deswäje loß ich mich dis Johr nor verbrenne, domet ich am 11.11. widder opsteije kann us mingem Rich deef unger Kölle, wo ich als Föösch vum kölsche Souterräng resedeere, en der Hoffnung, dat dä janze Corolla-Driss dann ein för aldemole vürbei es.
Ävver doför moht Ehr selvs sorge; wat zo dun es, wesst Ehr meddlerwiel zo baaschte: Zom Beispill AHA (Achtet Henriettes Armlänge). Ehr doht dat am Engk och all för mich. Als Dank kritt Ehr för die Zick bes dohen noch e klein Jedech vun mir met op dä Wäch.
Corolla, do Dressplog, bahl bes do endlich fott! Do dreckelig klein Fresen: do kriss uns nit kapott! Un selvs dä Nubbel kann för ene solche Dress nix för Un trotzdäm jon ich jähn för Üch wie immer en et Füür, domet Ehr dann em näkste Johr, wann Ehr nor hat Jedold ald widder rofe künnt wie söns: „Dä Nubbel es et schold!“ Bes dat mer dat Corolla dud han, sin höösch mer all un brav. Un jrad en su ener schwere Zick, do rofe mer „Alaaf“! Mer loße, weil mer Kölsche sin, et Köppche doch nit hange, mer wesse doch: Et hät wal immer, immer jod jejange Mer sin uns widder em November, leev kölsche Jecke!
Vun Hätze Ühre Nubbel
Wörterbuch
Fresen - abscheuliches Wesen Trone - Tränen Nüsele - Kleingeld Truus - Trost Schruppsüffer - einer, der auf anderer Kosten trinkt Bicht - Beichte Föösch - Fürst zo baaschte - im Überfluss Füür - Feuer wal - wohl