Abo

Walter Oepen op kölschEt hät noch immer jot jejange!

Lesezeit 3 Minuten
Neuer Inhalt

Autor Walter Oepen

Köln – ä optimistische kölsche Sproch, dä sujar em § 3 vun unsem Jrundjesetz steiht, weed en der Corona-Zick jo ärch strapezeet, wo mer jetz ald de Sorch han, dat de Virus-Mutante dem Impfstoff en lang Nas trecke künnte. Ävver dis Woch hät et dreimol jeflupp met däm „Jotjon“. Zom Eeschte: Unse FC (dat bedück „Fahrstohl-Club“) hät doch tatsächlich ens jewonne un dobei sujar zweimol et jechnerische Tor jefunge! Dat die noch wosste, wo dat steiht! Dat mer dat noch ens erlevve durfte!

Dat bedück ävver noch lang nit, dat se och met dem „Klassenerhalt“ lans Schmitz Backes sin. Doför jilt § 2: Et kütt, wie et kütt! Un wann et schlemm kütt, § 4: Wat fott es, es fott! Och bei enem ander Foßball-Kreppche es et noch ens jot jejange. De bestusste Funktionäre vun 12 jroße Clubs en Europa, die et Jeld erus jeschmesse han wie der Fastelovendsprinz de Kamelle un jetz wäje Corona pleite sin, hatte widder ens de Dollarzeiche en de Auge un wollten en eije Super-Lija jründe. 3,5 Milliarde Euro wollt ene amerikanische Finanz-Zampano denne 12 Euro-Apostele hingen eren däue, bevör och nor eimol jäjen et Ledder jetrodde wor! Ävver domet han se sich öhntlich nevve der Emmer jesatz. Fans, Spieler un Offizielle däte sich op de Hingerbein stelle un sujar dä jenau esu bestusste Boris Johnson wor dojäje. Do feel die Super-Lija en sich zesamme wie e Kaatehuus. Noch ens jot jejange!

Die Totengräber des Fußballs

Ävver och en der UEFA-Spetz jit et Dudejräver, die dat bessje en de Tonn kloppe welle, wat vun däm Foßball noch üvvrich jeblevven es, dä mer Ahle kenne un schätze jeleht han. Die Kicker-Kuckelkorns blosen ehr Champignon-Lija op wie en Putschblos, dat de letzte Spannung zom Troor jeiht. § 5: Nix bliev, wie et wor! Do hilf nor dat Eine: Nit mih hinjon un nit mih en der Flimmerkess zolore. Dann es et en zwei bes drei Johr widder su wie et wor. 

Das könnte Sie auch interessieren:

„Jotjon“ zom Drette: Dä bajuwarische Politrambo, Demoskope-Kanzler un Lejebaron hät sich verzock! Die klein Öcher Print wor för ihn zo hatt för ze käue. Jetz kann hä eesch ens en München wigger sing Wießwoosch „zuzeln“ statt en Berlin Bulette müffele. Och dat es noch ens jotjejange, ävver avwade, nit nor jot Duve kumme widder!

Mit Vernunft und Impfstoff

Su, jetz jon ich bei der schwatze Moderjoddes en der Kofferjass en Kääz opstelle. Eintlich jläuven ich jo an nix, ävver vielleich hilf et doch, zosamme met vill Vernunnef, Jedold un mih Impfstoff däm Virus et Levvensleech uszeblose. Domet mer singe künne: Et hät noch immer, immer, immer jot jejange, un et weed wal jot noch jon (Note beim Tonger)!“

KStA abonnieren