Michael Hehn schreibt „op kölsch“Em Schretttempo zur Entschleunijung
Michael Hehn
Copyright: Grönert
- Michael Hehn ist Musiklehrer am Dreikönigsgymnasium in Bilderstöckchen.
- Im Karneval geht er als „Dä Nubbel“ in die Bütt, um über aktuelle Entwicklungen auf Kölsch zu spotten.
- Der Redner und Autor ist einer der Autoren, die wöchentlich im „Kölner Stadt-Anzeiger“ in einer kölschen Kolumne aktuelle Entwicklungen aufs Korn nehmen.
Köln – Die Stadt Köln jitt sich jähn mondän. Üvver dat Resultat denk mer dann off „mon Dieu!“ Ävver jitz jitt se sich modän. Un dann denk mer sich nor noch „Oh Jott, oh Jott!“ Mer dun jitz nömlich entschleunije: Mer han die verkehrspolitische Antwoodt op „Slow-food“ jefunge: Schretttempo!
Wat sehnt mer sich noh däm ahle Heraklit: Panta rhei – wat frei üvversetz suvill heisch wie: Alles flupp! Als dä dat jesaht hät, meinten hä ävver sicherlich nit dä Verkehr en unserer Stadt. Dann dä flupp nit un dat hät vill met dä neue Modänität zo dun: Mer well jo jitz dä Autoverkehr en der Stadt stark redozeere, wat eijentlich en dolle Saach wör.
Wörterbuch
heisch - heißt fluppe - schnell und reibungslos bewegen, laufen lassen ophöört - aufhört Nümaat - Neumarkt leever - lieber anbeede - anbieten liet - lässt föhrt - führt die Zäng usbieße - die Zähne ausbeißen
Dann moss mer ävver op der andere Sick andere Verkehrsmeddel och attraktiver maache: Busse un Bahne oder et Rädche. Vun dä nirvije E-Scooter spreche mer he nit.
För die Radfahrer hät mer och ald vill jedon, nor halt op kölsche Aat: Op dä Ringe hät mer av un zo ens en Fahrradspor, die dann ävver widder ophöört, dann fährt mer op däm ahle usjelötschte Radwäch wigger bes zo der Stell, wo dä jrad avjerisse weed, bei der Queerung am Nümaat steiht mer als Radfahrer zwangsläufig vür ener ruden Ampel un op der Nord-Süd-Fahrt spendeert mer dä Droht-esel janze 350 Meter Radwäch, die esu unverhoff am Eng sin, wie se anjefange han. Un wat mäht mer dann? Trottoir? Avsteije? Schiebe? Wä denk sich su jet us?
Das könnte Sie auch interessieren:
För die Lück, die leever Bus un Bahn nemme weed die Öcher Stroß neu anjemolt. Die Lück solle „park and ride“ maache. En dolle Saach. Nor moss mer denne zomindest ene Parkplatz anbeede un kein Pförtner-Ampel enstaleere.
Stelle mer uns ens janz dumm un frogen uns: Wat es en Pförnter-Ampel? En Pförtner-Ampel liet jet eren, wann et vun drusse dröck. Somet es en Pförtner-Ampel et Jäjedeil vun enem Pförtner-Muskel: Dä liet jet erus, wann vun inne jet dröck. Dat Resultat es en beidse Fäll dat selve: Dress. Un esu weed us ener En- un Usfallstroß quasi en Durchfallstroß.
Domet wöre mer bei der Expressspor för Busse un Taxe: Durchfall es jo quasi dä Express vun der Verdauung, die Expressspor föhrt ävver zo Verstopfung. Un an däm janze widderspröchliche Durcheinander däht sich sujar dä ahle Heraklit die Zäng usbieße.