Kölsche Kolumne zum GendernMännlich, weiblich, weißnich
Michael Hehn
Copyright: Grönert
Köln – Ich bejrief de Welt nit mih. Un dat hät dismol, usnahmswies, janix met dem C-Wood zo dun. Et jeiht nömlich öm „*“, „_“ , „-ix“ un „-ens“. Dat es eijentlich vill schlimmer, als dat Virus, ävver mer kritt et leider met ener Spretz nit mih fott: Et Jendere.
Jitz frög sich mänch einer, besonders vun dä äldere Lück „Wat bedügg dat üvverhaup? Woröm schrieve un spreche die Lück op eimol esu jeck? Ben ich etwa esu ene ahle Sack*_ixens_in, dat ich dat nit mih verstonn?“
Un jenau he mööch ich ansetze, öm denne Minsche, die met däm janze Wahnsinn nix am Hoot han, zo sage: „Ehr sidd nit allein!“ Ich ben 1967 jeboore. Do jov et zwei Jeschlächter, die kannte mer all: Männer un Fraulück. Hück, jod fuffzig Johr späder, jitt vun denne Jeschlächter ald mindestens zweiundrissig (konservatev jeschätz). Un ich kenne noch nit ens dat drette! Dat drette Jeschläch kritt jitz en alle öffentliche Jebäude per Anodenung ene eijene Avtredd. Et jitt jitz also: Fraulück, Männer un.......Diverse.
Macht es wie im Gürzenich! Ein Klo für alle!
Ävver wat sin dann die Diverse eijentlich? Un wie süht esu en Toilett us? Es dat en Zinkbütt oder einfach nor e Loch en der Ääd? Darf mer do em setze pinkele un muss em stonn drieße? Darf do jeder drop? Wat mäht et Dreijesteen? Dann künnt mer sich dä janze Zinnober met der drette Toilette ald ens spare un maht et esu wie em Jözenich en der Paus vun ener Setzung. Do bruch mer nömlich nor eine Avtredd: Un zwor dä vun dä Häre, do jeiht dann wie selvsverständlich eh jeder drop, ov Frau, ov Mann, ov Divers. Un et Dreijesteen. Zoständ wie bei dä Franzuse! Do jitt et ävver statt drei Müjjelichkeite mieschtens immer nor ein sich zo erleichtere.
Mer sin jo schleßlich och Halv-Franzuse. Deswäje jitt et jo och dä Halven-Coque en Kölle. Ävver dat es en andere Jeschich. Wat mich doch ärch bedröck es nit die janze Klosetterie, et mag jeder do hin jon, wo et am beste rüch, et es die Vergewaltigung der deutschen Sprache und deren Dialekte.
Wann et nit mih Va un Mo heiß, sondern Elternteil I un II, wann mer sich zänk üvver die Nationalhymne „...blühe deutsches Vaterland...“, (wat es dann eijentlich met der Muttersproch?) un wann mer selvs Jedeechte vun Goethe, Schiller un Berbuer ändere well op Beeje un Breche, nor weil e paar Lück am lauteste am schreie sin....wo höört dat op?
Das könnte Sie auch interessieren:
Dann wör die Endung vun alle Wööder – zoeesch heeß et„-ix“, jitz „-ens“ – weil dat dä meddlere Deil vun Mensch es met dä passende Pronome „ens“, „dens“, „meinens“,op Kölsch dann, wäje Minsch „-ins“, „dins“, „minens“ heiße. Dat mäht selvs die Akademie nit mih met!
Un domet wöre mer widder bei der Kölsche Sproch, däm Tabernakel unger der Dialekte. Do jitt et kein Jejändere: Mer han en der drette Person Singular nor vun denne zwei: Hä un It. Un Hä un It jon bei ener Setzung em Jözenich op dieselve Avtredd. Un wann It dann fädich es, jeiht it met im zo däm oder hä met däm zo em.
Un mer han kein Trifolens, kein Pens, kein Flönes, kei' Jeckebändchens, kein Hillije Drei Künnijens, kein Bläck Fens, Höhnens, Bringens, Kasallens. Un keine Nubbelens. Die einzije „ens“,die mer luuter han heiße „kumm ens, loor ens, sag höör ens, föhl ens, hald ens!“ Un dat kann it met im un hä met em maache, wat hä oder it well. Un nit, wat hens well. Weil: Wat dä Häns well, dat wesse mer nit!
Wörterbuch
Avtredd - Abtritt, Toilette Va - Kurzform von Vader, Vater Mo - Kurzform von Moder, Mutter Hä - er it - sie luuter - lauter, immer