Michael Hehn op kölschÖm Hemmels Welle Kölle!
Michael Hehn
Copyright: Grönert
Köln – Uns Kölle, uns Heimat! Heimat vun der schönsten Sproch op der Äd nördlich vun der Südsee, Heimat vum beste Bier südlich vun der Nordsee un Heimat vum jrößte Dress zwesche beidse Seee.
Kölle hät bundeswick esu en schläächte Reputation, dat nor uns selvsjefällije Jenöchlichkeit, Hybris well mer se wal nenne, uns dovun avhäld, an däm janze Dress kapott zo jon: Uns eins staatse Stadt vum Krech fass kapott jemaht, ävver däm Dud noch ens vun der Schöpp jehöpp, op der Intensivstation jeläje, wo ehr met mediokre Quacksalver ehtz rääch an et Ledder jejange es – met Operatione wie Nord-Süd-Fahrt, Avriss vum ahle Opernhus, „Neugestaltung der Ringe“ met däm Schmuckstöck Barbarossaplaatz un un un…
Viele Gründe zum Klagen
Uns eins staatse Stadt, die hück kühmp un klach üvver ener Nord-Süd-U-Bahn, die nit fädich weed un alles en Schutt un Äsch läg, wat ehr en die Quer kütt (mer darf janit an die West-Ost-Verbindung denke), unger ener Opernhus-Saneerung, för die mer sich en komplette Elphi (nit Scho-Antwerpes) hätt baue künne, unger enem Museumsneubau tireck am Rothus, bei däm et zwor schön erav jeiht ävver nit vörran un mer sich als Kölsche dorüvver freut, dat et Rothus an sich üvverhaup noch steiht.
De Stadt klach üvver enem Verkehrskonzepp, dat Rechtung Zokonf wies, woför mer ävver wesse sollt, welche Rechtung dat jenau es (Fahrt ens met däm Rädche üvver die Ringe, et es spannender als ene Drohtseilakt zwesche de Domspetze). Womet mer endlich beim Thema wöre: Öm Hemmels Welle! Jitz och noch die Kirch!
Jäje dat, wat unsre Äzbeschoff jrad veranstaltet, es all dat Andere noch nit ens Kokolores. Wie kann mer Minsche, och wann et Kolleje, Fründe, Subalterne oder wat weiß ich noch, wat se sin, wie kann mer die en Schotz nemme oder ehr Tate verschleiere, ovschüns se et Dreckelligste un Widderligste jemaht han, wat ene Minsch üvverhaup maache kann: Kinder zo missbruche. En der Kirch!
Kleine Fetze, die jedaach han, dat se ehrem Pastur vertraue künne, die jähn ens Messdeener jewoode sin, weil se stolz drop wore am Altar zo deene, die en katholische Heime vun Nonne un Jeistliche en jeder Form misshandelt woodte un sich nit wehre kunnte, weil et Pänz wore. Dä Härjott muss doch us alle Woelki falle!
Das könnte Sie auch interessieren:
Unsre Äzbeschoff deckt Minsche, die sich an Fünfjöhrije verjange han? Ich kann janit esu vill esse, wie ich dann speie künnt. Dat Zölibat jalt ald ens als Zeichen vun Reinheit. Dovun bliev nix hange, wann die Kirch oder zomindest ehr Chefpersonal nit flöck de Kihr krijje.
Uns hät ens en Bischöffin met däm nit normale Glaube vürjemaht, wie dat jeiht: Anjedrunke met däm Auto jefahre, erwesch woode, zoröckjetrodde. Chapeau! Die hät ehr Amp verstande. Em Jäjesatz zo däm Skandal en der Katholische Kirch wor dat en Petitesse. Ävver it hät et jedon.
Dann wären die Kirchen wieder voll...
Unsre Beschoff es nor noch en peinliche Kläävbotz, die sich entschöldigt för die Kritik an ehrer Person. Bei esu jet, verjeiht mer selvs dä Appetit zom Speie. Deswäje weeden am Jereech die Termine knapp vür uszotredde. Ich han et ald unger singem Vürjänger jedonn. Ich wor ens stolze Messdeener, ich hatt ene dolle Pastur. Dä heeß Zobel un eijentlich möhten solche Lück, die die wahre Caritas levve, janz noh bovven! Dann wöre die Kirche och widder voller. Ävver vürher kann mer met der U-Bahn zom Opernhus fahre un donoh em Museum Mikwe noch eine drinke. Dummerwies weed dat all am Engk em Ordner Kölsche Verhältnisse subsummeert. Öm Hemmels Welle!
Wörterbuch
Jenöchlichkeit- Genügsamkeit wal - wohl kühmp - jammert Äzbeschoff - Erzbischof ovschüns - obwohl Fetze - Kinder Kier- Kurve, Kehre