Marina Barth op kölschHaue un Steche em Ungerholz
Kabarettistin, Regisseurin und Stadtführerin Marina Barth
Copyright: Max Grönert
Köln – Ming Mamm hätt dis Däch et zweite Spretzje krijje. Un och dr Jatte, dat Runderöm-Risiko par Excellance, hätt e Terminche avjesstaub. Dat mäht mich fruh! Ich persönlich lötsche för de Desinfektion entspannt e Kölsch un wad av, bess ich an dr Reih ben. Un wat die mir dann jenau en dr Ärm erindäue - Lückcher, dat es mir dressejal! Mr müsse jetz de Nerve behalde, uns Doktere maache dat schon.
Zur Wessenschaff han ich Vertraue. Zur Politik langsam, ävver secher, och widder. Ihrlich. Denn die halde ihr Griffelcher jo zonehmend us dr Pandemie erus, weil se sich met andere Saache beschäftije müsse un sich op ihre vürnehmste Pflichte besinne.
Hahnenkampf verkürzt die Wartezeit
Esu wie bei dr CDU und däm ihr bayrisch Sösterhätz. Weil die wisse, dat mer noch lang nit am Schmitz Backes vörbei sin un mir noch mondelang op Veranstaltungen, Kunzääte un Krimi em Stadion verzichte müsse, kümmere die sich endlich dorüm, woför mer se bezahle. Hadder jesinn? Die han extra för uns Junkies en dr Waadeschleif un em Homeoffice mit jratis Usjangssperre em Click & Collectmodus ald wedder e Live-Thiater jestreamt, dat sech sinn losse kann! Met allem Zip un Zapp. För lau! Um uns dat Waade ze versöße!
Naaks, stechendüster: Prolog op Waldlichtung: Zwei wackere Kämpe jevve sich met Bohei et Ihrewood. Ihr weiße Westcher blitze unschöldig. Doch tirektemang em Morjegraue sammelt jede Lump singe Spießjeselle hinger dä nächste Ficht', un et Haue un Steche em Ungerholz kann lossjonn. Av un zo loort einer vun denne us de Bösch un krakeelt en de Kamera: „Dat wor ich nit! Han ich nix mit ze dunn!“ Fanfare! Heulboje. Zängjeklapper. Tatää! Un vun vürre. Naach öm Naach Würje un Speie. Zauberspröch met jewollene Kämm om Blockserg. „Och do - ming Sohn, Brutus!“ Tatää!
Hinger Odem han ich dat Spellche verfolgt un wor janz hin un weg. Besser wie de peinlichste Folge vun Boor söök Frau! Esu spannend es dä Tatort nit ens mit däm Tukur. Tatää! Schon jeht et wigger. Privatjets kreise des naaks am Himmel, Limosine brause met Sekundante dovun! Nochens Tatää!
Schleeßlich dä Kampf op Levve un Dud. Un jenau wie beim Fingerhakele om Heimatovend Nesselwang, keiner liet noh! Verbisse wie zwei dolle Hüng, Stund öm Stund en dr Hauptsendezick bieße se sich durch de Deschplatt us deutscher Eich! Herrlich! Am Eng taumele beidse Protagoniste vum Acker, met Schröm, avjerisse, un dä eine hätt zwei Zäng erus - un do weiß, dä hätt' et letzte jejovve! Mieh kann hä wirklich nit.
Das könnte Sie auch interessieren:
Wie fad un blutleer wör Politik, wenn Parteie einfach ihre beste Lück noch vürre stellte, ihre Vürstellunge för Problem ze löse in e Traktätche schrieve un dat am Engk zur Wahl stelle däte! Bes zum Wahldach einfach ihre Job machte. Dat wör furchbar! Dat wör wie Bayern Münche. Oder noch schlemmer: Künnte mir jlich jrön wähle. Brr.
Wörterbuch
dis Däch - dieser Tage Sösterhätz - Schwesterherz Schmitz Backes – im Mittelalter Bäckerei im Kölner Süden; in Redewendung Ausdruck für die letzte Station eines Spießrutenlaufs stechendüster - stockdunkel speie – spucken jewollene Kämm – geschwollene (Hahnen-)Kämme liet – läßt hinger Odem - atemlos Hüng - Hunde Schröm - Schrammen