Köln – Wie han Bundespräsedöres un Kanzlerin jesaht? „Enä, wat för e Johr!“ En enem solche Fall es et Älder-weede nit immer nor vun Nohdeil: Die Zick flüss immer flöcker wie em Rüppche an uns vürbei. Esu künne ahle Minsche, su wie dä Autor, janz höösch e Höckche hinger 2020 maache.
Wat uns et neue Johr wal brängk? Mer wessen et nit. Ävver vill bedressener als dat ahle kann et jo fass nit weede. Un dozo han mer all ene jode Jrund zor Hoffnung: Et weed endlich jeimpf (mer kann nor hoffe, dat die Lück och verstonn, wie wichtig dat es), die fussije Schmierwoosch es bahl fott (ovschüns dä Jeck noch immer för en Üvveraschung jod es), met dä Brite hät mer op dä allerletzte Drücker noch ene Verdrag hinbekumme. n irjendwann künne mer och widder en die Weetschaff jon, öm op all dat eine zo drinke.
Die Knöchelcher als Dauerleihgabe
Dat hät Corona met uns jemaht: Mer freut sich ald üvver kleine Saache. Su wie jetz dat Fess vun dä Hillije Drei Künnije. Wat han mer dä drei Fente nit alles zo verdanke, zick dä Ärzbischof Rainald vun Dassel die Knöchelcher us Mailand als „Dauerleihgabe“ metjebraht hät: Ene staatse Dom un e paar Jahrhunderte Champions-League, met quasi all-inclusive-Päckche: Stapel- un Münzrääch, Piljer- un Freie Reichsstadt („halt fass am Rich, do Kölsche Boor un mag et falle söß ov soor!“) un nit zoletz: Volle Täsche. Domols. Dovun kann de Kämmerin hückzodag nor noch dräume...
Un och die ältste Schull vun Kölle drägt dä Nome vun dä Drei: Et Dreikünnigsgymnasium, et Tricoronatum vun 1450, an däm ich die Ihr han ungerrichte zo dürfe.
Kaspar, Melchior, Balthasar steche voll vun Mystik: Se repräsenteerte die drei domols bekannte Kontinente Europa, Asien un Afrika durch die Färv vun ehre Kleider blau, rud un jrön. Se ston ävver och för die drei Lebensalter Jugend, Lebensmitte un Greisentum.
En genderjerächte Krepp?
Un wat mer esu em Jepäck hät, wann mer jet an de Fööss hät: Weihrauch, Myrrhe un, domols nit janz esu wertvoll, wie die andere zwei: Jold. Un wat maache mer zom Dank met inne? Mer diskuteere ähnzhaff, ov mer dä Künnig us Afrika als Schwatze darstelle dürfe oder ov dat rassistisch es. Mer persönlich fähle do die Wöödt.
Wat dann noch fählt: En genderjerääcjhte Krepp. Die hillije drei Künnijinne Karla, Mechthild un Barbara kumme met Migrationshingerjrund un artjerääch jehaldene Kamel (nit Kamelle!) met ehre Jove: Laktosefreie Myrrhe, Weihrauch us Fair-Trade-Handel un Jold us ökologischem Abbau. Jemeinsam bedden se met Marius un Josepha et diverse Jesixkindche an.
Das könnte Sie auch interessieren:
Jott sei Dank krijje die drei Orijinale em Dom vun all däm Jedöns nix mih met. Wat solle se sich och opräje? Schöner als em Dreikünnijeschring kann mer och nit ungerjebraht sin.
Wörterbuch
Nome - Name
em Rüppche - im Nu
wal - wohl
Künnije - Könige
Fente - junge Männer
soor - sauer
steche - stecken
jet an de Fööss han - wohlhabend sein
Jove - Gaben
Künnijinne - Königinnen
