Kölsch-Kolumne über Kölner Lichter„De janze Schau för lau – herrlisch!“
Marina Barth
Copyright: Max Grönert
- Marina Barth ist die Chefin des Theaters „Klüngelpütz“ in der Gertrudenstraße. Im Programm „Köln (nicht nur) für Anfänger“ bietet sie zur Zeit eine „Überlebenshilfe für Kölnbesucher und Zugereiste.
- Die Kabarettistin, Regisseurin und Stadtführerin ist eine von sechs Autoren, die wöchentlich im „Kölner Stadt-Anzeiger“ Texte für eine kölsche Kolumne schreiben.
Köln – Man kann uns Kölle doch nit am laufende Meter verkamesöle. Hürt doch de Knatscherei op un luurt op et Schöne!
Ich persönlich mag dä jroßartije Platz op unsere Rheinbullevacht! Dat es e Logeplätzje vum Allerfeinste janz för ömesöns. Un wenn dann et Sönnche ungerjeht, zwesche dä beide Domspitzelcher wie et Butterflöckche op dr Maischolle, dann sage ich för minge Hubäät: Wammännche! Besser jeht es nit. Jläsche Wing hammer uns selver metjebraht, Stöckelcher Brut un Kies dobei, wat bruche mer mieh?
Dat Treppche wor schleeßlich nit bellich, dat muss mer jitz och jenieße – allein dat Dinge ze putze kost e Milliönche et Johr. Wat för e Jeschenk vun unsere Stadt för ihre Bürjer!
Das könnte Sie auch interessieren:
Un wenn et dann Juli weed! Wenn dr Rhing en alle Farbschattierunge schangscheere däht, wie Helligovend un Ü-Fuffzig-Disko op eine Schlag! All die Stuvvekreejer sich met Ääpelschlot un Pittermännche op dr Wäch mache, Campingstöhl dobei un waade, dat et losjeiht. De janze Schau för lau – herrlisch! Kölner Leechter – ävver natürlich nit op unsere Rheinboulevard!
Sidder beklopp?! Dat wör doch vill ze jefährlich! Wenn da Dausende vun Minsche op einer einzije Trepp' drängele, am Engk deit de Mamm – fuppdich - en de Flute plumpsche. Nä, öm Joddes Wille!
Wenn Kölner Leechter sinn, muss dat Dinge afjesperrt weede. Jo – sicher! Wie an Silvester. Wo köme mir söns hin?!
Wörterbuch
verkamesöle: verprügeln, verdreschen
ömesöns: umsonst, kostenlos
Wammämche: freudiger Ausruf, auch Ohrfeige
Helligovend: Heiligabend
Stuvvekreejer: Stubenhocker
Ääpelschlot; Kartoffelsalat
fuppdich: schnell, ruckzuck
pareere: parieren
düür/döör: teuer
Wenn se am Engk em Bürjeramt Platzkäätche verschenke däte... zom Beispill an Kölner, die et vielleicht nit janz esu joot jetroffe han, wie dä Hubäät un ich! Lück, die krank sin, ärm oder allein – Lückscher, die sich öm andere verdeent jemaht han. Maache mir doch jedes Johr en neu Verlosungsaktion! Ävver dat jeiht jo nit!
Da mööte se kontrolliere, wer do op die Trepp kütt, möhte dat Dinge avsperre un oppasse, dat och all Passante pareere, paar Förwehrmänner opstelle – dat wör jo vill ze düür. Dat müsse se natürlich nit, wenn keiner op die Trepp soll, dat jeht vun janz allein....es doch klor!