Marina Barth „op kölsch“„Sick Mondach es et Leech widder us, nit nur em Roxy“
Kabarettistin, Regisseurin und Stadtführerin Marina Barth
Copyright: Max Grönert
Köln – Himmelherrjottsakrakotzkümpche – ich han su en Krawatt'! Ich ben esu wöödig, dat selvs dr Hungk ungerm Bett et Kriesche anfängk. Ich han de letzte Woche un Monde ming Thiater op dr Kopp jestallt. Ich han Speischütz jedrage, dat Woot „kontaktloser Desinfektionstower“ un „Einlasskohorte“ jeliert, de Bud freijeräump. E Hygiene-Konzepche jehäkelt, CO2-Warnjerät jekauf, sämpliche Infos selvs zesamme jesöök, weil bei dr Stadt natörlich keiner Bescheid woss.
Ich han ming Kollege ermutigt, neu Böhneformate uszebaldowere, die mer och in Seuchezigge maache künne. Mir han uns täglich durch dä Verordnungsdschungel un Amtsblättchewald jekämpf wie Hännesje un Griet durch dä Hexebüsch. Mer han en jroßaatijes Publikum bei dr Stang jehaale mit löstige Aktiöncher un Youtube-Filmcher...
Op de Mittel för Investitione waade mer hück noch
Noh lange, unjewisse Monde als Wanderbühn', han mer neu Finster enjebaut kreeje (En Huh op öns Vermeeter, denn op de Mittel för Investitione waade mer hück noch) und uns Klüngelpützje wedder opjemaat. Endlich! Hurra! Dä Rest vun dä Jeschicht' es bekannt.
Sick Mondach es et Leech widder us, nit nur em Roxy. Ich well he nit falsch verstande wäde. Ich han kein Aluhötche op. Ich schwaad' och nit vun Berufsverbot, wie dat manche Kolleg in singer Verzwieflung däht. Nit nur, weil et kompletter Blödsenn wör'! Historisch es dä Bejriff mit janz andere Schandtate verknüpf. Ich sage noch nit ens, em Thiater hätt sech noch keine infizeet, obwohl nit eine Fall bekannt es. Ich sage dat nit, weil drei Veedel vun dä Lück jarnit wesse, wo die sech infizeet han. Ich han enjesinn, dat en Pandemie radikales Ömdenke un jrößte Vörsich verlang! Secher dat.
Mer bruche en Perspektive
Wat mich ävver raderdoll mäht, es, dat mer ohne Senn un Geheens in et Verderve marscheet sin! Et es drei Monde her, da han ich jenau he noh enem Plan jefroch, wie dat wiggerjonn sull em Hervs, wann dat Virus widder kütt? Mer bruche en Perspektive, han ich jesaat, als mer downunder en Australien, wo dr Winter jrad anfing, beloore kunnt, wat uns passeere weed.
Das könnte Sie auch interessieren:
Mer hätte Zick jehatt, jode Lösunge ze finge, öm ze verhindere, dat Thiater un Kneipe zoomache müsse. Wat mache mer mit dä Schull, met Kitas? Met däm ÖPNV, wenn et ränt un keine met däm Rädche fahre well?
Schichtbetrieb, rollierender Arbeitsbeginn – all dat loch op dem Desch. Wo es dä Plan? Bei dä Infezeetezahl kütt dat, bei dä nöhkste dat... Wenn et nit esu läuf, wie et sull, mache mer dat… „Hammer un Danz“ nennt dat dä Viruloge un meint: Maßnahme parat han, wann dat Infektionsjedöns us em Ruder laufe well. Je mieh do laufe lööß, desto jrößer muss am Engk dä Hammer sin.
Testzentre us däm Bodde jestampf
Uns Chefetage hätt em Sommer leever noh alle Sigge Danzkäätche verdeilt, statt Finster en Klasseräum enzebaue. Se han de Lück en Urlaub jeschick un Testzentre us däm Bodde jestampf. „Süch aan, su ne Urlauber kütt jo och widder heim. Dat hätte mer jarnit jedach...!“ Deshalv muss dä Hammer jetz esu deck sin! Deshalv triff dä jetz och de Falsche. Die, die 'mem Arsch zohus ihre Job jedonn han.
Wenn sich die Infektione jede Woch verdoppele, han mer in sechs Woche en Million Infizeete! Dat well keine. Wat ich well, es en Regeerung met enem Plan. Denn: Überraschung! Noh de Chressdäch es dä Virus immer noch nit fott! Un bes dat all de Lück jeimpf sin, die welle, duurt et lang. Manche sage, et duurt Johre.
Un jetz well ich wesse, wie ihr üch dat mit däm Thiater bes dohin vürjestellt hat!
Wörterbuch
wöödig - wütend kriesche - weinen Monde - Monate jesöök – gesucht Vörsich – Vorsicht Geheens – Gehirn, Verstand Verderve – verderben Hervs – Herbst parat – bereit lööß – lässt Sigge – Seiten Chressdäch – Weihnachtstage duurt – dauert vürjestellt – vorgestellt
Zur Person
Marina Barth ist die Chefin des Kabarett-Theaters Klüngelpütz, das massiv von den Einschränkungen durch die Corona-Krise betroffen ist. Nicht nur zu Lockdown-Zeiten macht das Theater digitale Angebote, mit Livestreams oder Hörbüchern. Mit der Hochschule für Medien, Kunst und Wirtschaft will das „Klüngelpütz“-Theater einen digitalen Adventskalender entwickeln. (fra)