Michael Hehn „op Kölsch“„Doht üch schön maskeere, mer dun et nit nor för Kölle!“
Michael Hehn
Copyright: Grönert
Köln – Jitz, noh fünef Woche – et kom einem vür wie en Iwigkeit – weede mer endlich jelockert, ovschüns mer uns esu verspannt han, dat mer su locker su flöck janit weede künne wolle.
Dobei es „lockern“ e furchbar Wood. Mer hät vielleich ens en Schruv locker, ävver kann mer em öffentliche Levve locker sin? Mer künnte widder „normal“ weede, also dä „Status quo ante“ erreiche, wat nüdig es un wat och bahl widder kütt.
Mer künnte zomindest en kölsche Medizing anwende
Ävver sulang mer dat noch nit künne, künnte mer zomindest en kölsche Medizing anwende und dat medden em Fröhjohr: Mer dun uns maskeere!
Zur Person
Michael Hehn ist im Karneval als „Nubbel“ unterwegs, um in der Bütt über aktuelle Entwicklungen zu spotten. Im bürgerlichen Leben ist er Musiklehrer am Dreikönigsgymnasium in Bilderstöckchen. In Zeiten der Corona-Krise hat er sich als „Designer“ für Schutzmasken betätigt und sich für eine Stickerei in Engelskirchen Sprüche ausgedacht. (fra)
Wann dä Düsseldorfer ald ens em Mai singe Rusemongagszog widderhollt hät, läje mer noch eine drop un dun uns all staats maskeere, ohne dat et Fesskumitee jet zo sage hät! Jeck em Sunnesching!
Un die Kölsche maache dat met Akkuratess: Wann hät mer dann söns ens die Müjjelichkeit 50% vun singer Visage frei zo jestalde? Dat jitt et doch söns nor an Fastelovend. Un et Schönste: Bahl müsse mer uns all maskeere! Ärjerlich es, dat uns die Bayern do em Vüraus wore. Eijentlich hät dat Jebodd us däm Rheinland kumme müsse, quasi als lex coloniensis.
Janz Verdötschte künne sich och noch e Hötche opsetze
Un dann künne mer maache, wat mer wolle: Vun der Stübbschotzmask us däm Baumaat, quasi et Einsteigermodell för Immis, üvver selvs jeniehte Lappe us der ahl Schabrack vun der Oma bes hin zom Kunstobjekt för dä fortjeschreddene Maskedräjer. Janz Verdötschte künne sich och noch e Hötche opsetze.
Das könnte Sie auch interessieren:
Dä Kölsche hät dat doch en singe Jene: Die bunte Vielfalt, dat Jeck loß Jeck elans. Dann maache mer halt jitz dodrus: Jeck loß Jeck 1,5 Meter elans! Colonia statt Corona! Kumm loß et fiere, nit enfezeere!
Dann zosamme ston heiß: Avstand halde.
Su en Mask verdeck dä jrößte Deil vun der Mimik
Su en Mask hät ävver och jet Ambivalentes en sich: Dat Dinge verdeck dä jrößte Deil vun der Mimik. Dat kann ene Vürdeil sin bei Muuzepuckel, Jrielächer (denne süht mer dann janix mih an), schlääch Raseerte un bei Lück, die us der Muul rüche, kann ävver och vun Nohdeil sin bei Minsche, die jähn laache un Amelung han. Ävver die künnen sich jo üvverläje, wat se sich jähn drop schrieve dähte op dä Mundschutz, oder op Kölsch: Op die Schwadmask. Un dat es dann em wohrsten Senn: Mund-Art.
Doht üch schön maskeere, mer dun et nit nor för Kölle!