Arno Steffen „op kölsch“Olympiahelde beim Pädsmetzjer
Lesezeit 3 Minuten
Arno Steffen
Copyright: Max Grönert
Arno Steffen ist Musiker, Komponist, Produzent und engagiertes Mitglied der Initiative Arsch huh
Das Ex-Mitglied der Zeltinger Band und LSE ist einer der Autoren unserer wöchentlichen Kolumne "Loss jonn"
In dieser Folge erinnert er sich an Zeiten, als es noch ziemlich normal war, Pferdefleisch zu essen
Hück dät ich üch jähn ens eine vum Päd verzelle. Mer kütt als Musiker en dä Coronadäch schon ens ahn et Jrübelle, weil mer nirjendwo mieh Musik maache darf un och nit weiß, ov et üvverhaup noch Applaus jit! Mer levve en dr Daach eren un looße uns drieve... zesamme met däm ennere Jejöhmere. Doh krijje ich dann irjenswie Jedanke ahn fröher.
Pädswoosch statt "pulled Pork"
Un jetz jrad, wo ich ahn en der Alexianerstrooss verbeikumme, do wor ich fröher och ad ens jähn en enem Esslokal. Doh joov et kei „Pulled Pork“ un keine „Cheeseburger“, wat ich och jähn mag, sondern en Pädswoosch udder en Portion Surbrode vum Päd met Klöß. Dat alles en der Pädsmetzjerei „Pitsch“ met ahnjeschlossener Jaßstätt.
Fröher wod Pädsfleisch vell vun dä Lück jejesse, un zwar esu vell, dat sech drei udder vier esu Läde, en Kölle verdeilt, luhne däte. Un nit nur wäje dr Bioaufzucht un dä ennere Werte: Vell Lück kunnten sich kein Steaks vum Rind leiste.
Dä Jäsch – ene jruße Fan vum Pädsfleisch - küt aff un zoh bei mir doheim verbei un brengk mer e Stöck Delikatess Pädswoosch met. Ich saren üch! Hückzedaach jit et nur noch eine Pädsmetzjer en Müllem. Un eine Buur op däm Wochemaat.
Et letzte Mol - en dä 80er Johre - als ich beim „ Pitsch“ wor - kann ich mich ahn e Jespräch erennere, dat ich met däm wieshöörije, äldere Mann hat. En singem Lade dät et noh Köch, Zaus un Zarettequalm röche. Fröher han de Lück noch beim Esse jerauch!
Halla an der Wand
Ich hatt’ mer schon jet vürjenomme un e paar provokante Frore zom Thema Pädsfresserei parat. Su ben ich noh däm Surbroode zo im ahn de kleine Thek jejange. Die Thek stund e bessje hüher en dem Jaßraum, domet hä alles sin kunnt un och wat ahn Esse us dä Köch kohm. De Wäng wore met ahle wiesse Kachele jetäfelt, e bessje soch et us wie hück en dr „Fette Koh“. Övver dä Thek hingke e paar jerohmte Bildcher vun Olympia - Hans Günther Winkler un si Superpäd „Halla“. Dat jov mer ze denke, doh wullt ich ahnsetze!
Ich hann dann 3 Kölsch späder jefroch, wie dat dan alles zesamme jingk? Surbroode, Pädswoosch, Heldepäder , Halla un esu? Dodrop luurten hä mich nit unamüsiert ahn un sat: „Wenn dat esu wör, wie sie jetz sare, junger Mann, dörf’ enne Schwemmer nie em Levve ene Schlock Wasser drinke.
Dä wor e Stöckche wigger! Jot vörbereitet. Besser als ich, han ich bei mir jedaach. Ävver esu kammer och ens Zweiter sin.
